Publicamos aquí un cartaz anunciador das Festas Parroquiais do ano 1950 na honra de San Roque e Nosa Señora do Rosario, confrarías relixiosas que había na parroquia dende facía varios centos de anos, como así o demostra a documentación custodiada no Arquivo Histórico Diocesan de Compostela.
Ditas confrarías desapareceron a mediados do pasado século XX, e só nos queda delas as misas que cada 16 de agosto se celebran na capela de San Roque da Granxa, xunto cas misas e festas da outra confraría que había en Carreira, a da Virxe da Guía. Podemos observar vendo o cartaz, que o mes no que se celebraba o evento era en outubro, mentres que a romaría da Guía se celebraba como era costume o primeiro luns de Pentecostés, e a festa na honra do patrón San Paio, o día 26 de xuño.
Dous días de celebracións relixiosas e festivas, que remataban cun grande concerto a cargo do daquela exitoso grupo musical Los Beiros, para seguir á medianoite cunha queima de fogos de artificio xunto cunha grande cantidade de bombas.
No cartaz aparecen algúns dos negocios punteiros da parroquia neses anos onde había variado tipo de actividades; tendas de comestibles, tendas de panos, fábrica de gasosas, muíños fariñeiros, carnicería, zapatería, panaderías… e tamén aparece un anuncio do daquela famoso transportista “Sevilla”, que co seu carro e o seu cabaliño chamado Lindo, repartiron todo tipo de mercadorías pola parroquia e arredores, que tal e como reza no anuncio… “non ofrece rapidez, pero sí seguridade“.
O carro de Sevilla e o seu cabaliño Lindo.
Amosamos aquí unha das poucas imaxes que existen do carro de cabalos de Sevilla, que neste caso está a carón da antiga tenda de comestibles de Mós, no Cruceiro, fronte á cruz do Cristo dos Aflixidos.
– Cartaz cortesía de Pepa Muñiz e de Fco. Sevilla (Carreiriña).
– Imaxe do carro cortesía de Mari Pazos (Ribeira). Retocada e coloreada.
Deixa unha resposta